मानव

तिमी त साह्रै मजबुत मान्छे

तिम्रो खाँचो छ यति वेला

ती कमजोर आँखामा साहस भर

ती दुखी मनमा विश्वास भर

ती मर्दै गरेका सपनामा उत्साह भर,

बताऊ उनीहरुलाई

सूर्यको किरण उस्तै छ

फूलहरु उसै गरी मुस्कुराइ रहेका छन्

चराहरु उसै गरी उत्साह बोकेर गाइरहेका छन्,

समय सधैँ उस्तै कहाँ रहन्छ र!

यो समय जसरी आएको छ

उसै गरी बितिजाने छ,

नपत्याए आफैलाई महसुस गरेर हेर

तिमीले देख्ने सपनाको रङ्ग उस्तै छ आज रङ्गीन,

हिजो जस्तै

फूलहरुको सुगन्ध उस्तै छ आज मिठो,

हिजो जस्तै 

चराहरुको गीत उस्तै छ आज मधुर,

हिजो जस्तै, 

तर नबिर्स!

तिमी मानव हौ अनि 

सङ्घर्ष तिम्रो नियति

यहाँ हार पनि तिमीसँगै छ 
अनि जित पनि तिमीसँगै छ,

समयको यो चुनौतीलाई स्विकार्दै

यो भयावह र विकराल परिस्थितिसँग

धैर्य र विश्वासले लडेर

तिमीले इतिहासलाई नयाँ साक्षी दिन्छौ या दिँदैनौ

त्यो तिम्रो हातमा छ-मानव।।