एउटा अलौकिक यात्रामा- हाम्रा प्रिय नेता जगतजंग थापा

जगतजंग थापा सानै उमेर देखि खुब सुनेको नाम हो दैलेख जिल्लामा, अझ विशेष गरेर जाहरकोट गाउँमा ।

म सोच्थे यति धेरै रवाफिलो नाम भएको मान्छे स्वाभाव कस्तो होला । उहाँ हेर्नलाई डरलाग्दो, छुच्चो हुनुहुन्छ होला । जब मैले उहाँलाई भेटे उहाँको स्वाभावसंग म यसै यसै तानिए।

 मुसुक्क मुस्कुराए कुरा गर्ने मायालु बोलि प्रेमिल स्वाभावले मलाई उहाँसँग कुरा गर्न अझ सजिलो बनाएको थियो । म उहाँलाई धेरै त जान्दिन तर जति उहाँको बारेमा जान्ने मौका पाए, उहाँलाई बुझ्ने अवसर पाए त्यसलाई यहाँ पस्कने प्रयास गरेकि छु ।

 मैले उहाँलाई सानो उमेरदेखि नै चिने पनि उहाँसँग नजिक भएर संवाद गर्ने मौका भने धेरै कम भेटेकी थिए। किनकि म स्कुलले जीवन सकेर आफ्नो शिक्षालाई निरंतरता दिन काठमाडौ भित्रीएपछी मेरो जिल्लामा बसाइ कम भएको थियो । र उहाँले आफ्नो जन्मथलोलाई नै कर्मथलो बनाएर जिल्लामा सेवा गरिराख्नु भएको थियो ।

२००७ साल जन्मनु भएको उहाँ आफ्नो स्कुलले जीवन सकेर उच्च शिक्षा हासिल गर्न काठमाडौ पसे पछि उहाँले आफ्नो राजनीति यात्राको सुरुवात गर्न भएको थियो । जिल्ला फर्केर केहि समय शिक्षण पेशामा लागे पनि उहाँले आफ्नो सम्पूर्ण जीवन राजनीतिमा सपर्मित गर्नु भएको थियो । पञ्चायत काल पछि राजनीतिमा पूर्णरुपले आँगमन गर्नु भएको उहाँको जीवनले २०४६ सालपछी एकपछी अर्को गति लिदै गयो अर्को उचाई छुदै गयो । यसरी उहाँ जनताका मनमा र माझमा समाउदै जानू भएको थियो । साँच्चै भन्नू पर्दा राजनीतिको क्षेत्रमा दैलेख जिल्लामा राम्रो दखल राख्ने व्यक्ति हुनुहुन्थ्यो उहाँ । जगजंग थापा भने पछि नचिन्ने कमै मान्छे होला दैलेख जिल्लामा ।

 उहाँले आफ्नो जीवनको सम्पूर्ण समय राजनीतिलाई दिनु भएको थियो । देश र देशका जनतालाई दिनु भएको थियो । आफ्नो उच्च शिक्षा पूरा भइसक्दा उहाँले जागिरलाई महत्त्व नदिएर राजनीतिको चुनाउ गर्नु भएको थियो । उहाँको आफ्नो माटो प्रती माया यसै यसै देखिन्छ । जीतलाई सम्मालन सक्ने र हारलाई स्विकार्न गर्ने सक्ने उहाँको यो खुबी मलाई साह्रै राम्रो लाग्थ्यो । जुन हामीले २०७४ सालको चुनावमा पनि देखेका थियौ । उहाँले भन्नू भएको थियो " हाम्रा आफ्नै केही गल्तिका कारणले हामीले हार्न पुगेयौ, प्रतिपक्षका विजयी साथिहरुलाई बधाई छ । हामी अर्को चुनाबमा हाम्रा कमि कमजोरी सुधार्नेछौ र फेरि लड्ने छौ" । उहाँको यो भनाइले धेरै मान्छेहरुलाई सम्मालेको थियो । राजनीति उहाँको जिन्दगीको थियो मुटुमा धड्किने सास थियो ।

 बिगतका दिनहरुमा त म जान्दिन तर यी दिनहरुमा उहाँको माटोप्रती सम्मान, दैलेख जिल्ला प्रतिको माया उहाँको आँखामा म प्रष्ट देख्न सक्थे । उहाले आफ्नो जीवनको सत्तरी वर्षको जिवन गर्विलो बाँच्नु भयो । यस्तो जिवन धेरै कम मान्छेले बाँचेका हुन्छन् संसारमा । यो कुनै आम कुरा हैन हामी नेपालीका लागि अझ हामी कर्णाली बासिका लागि । सत्तरी वर्षको जीवनमा उहाँ पञ्चायत, जनयुद्ध काल, लोकतन्त्र, गणतन्त्र र सम्पूर्ण नेपालीको राजनीतिक कालको प्रत्यक्ष दर्शी समेत हुनुहुन्थ्यो उहाँ । जतिजति देशले उतारचढाव सहदै गयो देशसंगै उहाँ पनि उतारचढावको भेल मिसिनु भयो ।

केही समय अगाडि म जिल्ला गएको बेला उहाँसँग बसेर धेरै कुरा गर्ने मौका पाएकी थिए मैले । लकडाउनको समय, काठमाडौबाट जिल्लामा गए कि म उहाँको घरमा उहाँले मीठो मुस्कान सहित गरेको न्यानो स्वागत म अहिले मिस गरिरहेकी छु । हजुरआमाको हातको त्यति मीठो चिया सायदै मैले कहिल्यै पिएकी थिए होला पहिले । मलाई हतार थियो तर उहाँसँगको सामीप्यताले मलाई हतार भएको मौसुस नै भएन । म अबको निर्वाचन कस्तो हुनुपर्छ भन्ने अनुशन्धानको शिलसिलामा उहाँसँग कुरा गर्न पुगेकी थिए । उहाँले भन्नू भयो "गाह्रो छ होला तिमीहरुको प्रश्न हामी त बूढो भएयौ अब" , अनि मैले भने "हैन यो युवा जवान देखि लिएर सत्तरी वर्षसम्म सबैले बुझ्ने प्रश्न हुन हजुरबुबा" । उहाँले भन्नु भयो "म पनि ठ्याक्कै सत्तरी वर्षको भए"। त्यसपछि हाम्रो सवाल जवाफको शिलशिला सुरु भएको थियो ।

 त्यो बिचमा उहाँले मेरो पढाई कस्तो छ, बसाई कस्तो छ स्वास्थ अबस्था कस्तो छ धेरै कुरा सोधनु भयो । उहाँको देश र जनता प्रतिको माया पाटिहरुले जिम्मेवार भएर काम नगरेको गुनासो पोख्नु भयो । अनि भन्नू भयो "अब त काम युवाहरु गर्नु पर्छ हामीले भनेको त सिकाउने अह्राउने मात्र हो ।" देशको बिग्रदै गरेको राजनीतिको चिन्ता उहाँमा प्रष्ट नजर आउथ्यो । उहाँसँग मैले करिव दुई घण्टा कुरा गरे । त्यो अवधिमा उहाँको सादा र सरलपन प्रष्ट झल्किन्थ्यो । दैलेख जिल्लामा उहाँले लिएको राजनीति उचाइ सायिदै अरु कसैको देख्न पाइएला अबको दिनमा । यो नै मलाई उहाँको सफलता लाग्छ ।

 उहाँ जति प्रीय नेता हुनुहुन्थ्यो उति नै जिम्मेवार अभिभावक पनि हुनुहुन्थ्यो । हाम्रो परिवारको पुरानो अभिभावक हुनुहुन्थ्यो । हाम्रो खम्बा हुनुहुन्थ्यो । उहाँले हाम्रो सम्पूर्ण परिवारलाई एकै ढिक्कामा बाधेर राख्नु भएको थियो । उहाँसँग हाम्रो धरोहर ढलेको छ, हाम्रो मजबुत खम्बा ढगमगाएको छ । जसको क्षति पूरा गर्न साह्रै गाह्रो छ ।

यतिबेला हामीले एउटा बौद्धिक सरल र उच्च सोच राख्ने नेता जसको जिन्दगी नै बिशाल र गौरमय थियो जसले आफ्नो जिन्दगीको सम्पूर्ण जीवन राजनीतिलाई समर्पित गर्नु भएको थियो त्यस्तो व्यक्तिलाई गुमाउदा हाम्रा आँखाहरु नम हुनु, हाम्रो मुटु दुख्नु आम कुरा हो । यतिबेला उहाँको मृत्यु हाम्रोलागी पहाड जस्तै गह्रौ छ । जसलाई सहजै स्वीकार्न गाह्रो छ । तर मलाई लाग्छ यो मृत्यु हैन यो आरम्भको एउटा हो अलौकिक यात्राको, सुन्दर संसारको ।

 मेरा हजुरबुबा सबैका प्रीय नेता हजुरलाई बिदा गर्न सजह त थिएन तर यो नियम हो सृष्टिको जसलाई स्वीकार गर्नु हाम्रो दायित्व हो । हजुर बुबा हजुरको यात्रा अझ सुन्दर बनोस्, सफल बनोस् यो मेरो कामना हो । हजुरको आशीर्वाद हामीमा फूल बनेर बर्षिरहोस् यो हाम्रो इच्छा हो । हजुर जहाँ भए पनि हजुर प्रती इज्जत र सम्मान सदा रहिरहेन । हजुरप्रति सहृदयी हार्दिक श्रद्धासुमन हजुरबुबा प्रीय नेता..... !!