मेरो प्रेमसँगको यात्रा

तिम्रो सानिध्यतामा

मैले आफ्नो सम्पूर्ण छहारी भेटेकि छु,

जहाँ, 

थकाइ मारेका छन्

मेरा धड्कका बेगहरुले

आँखाका खोजहरुले,

जहाँ,

सकिएको छ 

मेरो प्रेमको पर्खाइ 

अनि सुरु भएको छ 

मेरो प्रेमसँगको यात्रा

जहाँ मैले महसुस गरेकि छु-

आफ्नो स्वतन्त्रता, 

आफ्नो निम्ति तिम्रो सहृदयीता 

अनगिन्ती स्नेह, प्रेमिल स्पर्श 

अनि तिम्रो आँखामा 

आफ्नो निम्ति इज्जत, 

जसको हरेक पललाई बाधेको छ 

विश्वास,आफ्नोपन र आत्मियताको डोरले,

जहाँ,

सहजै सुनिन्नछन् 

मुटुका धकधकहरु

सहजै अहिसास हुन्छन् 

एकाअर्काका रोदनहरु,

जहाँ,

आँखाले मुस्कुराएको छ प्रेम 

ओठले गुनगुनाएको छ प्रेम

अनि वसन्त बिना पनि

स्वयम् वसन्त बनेको छ प्रेम,

जसमा समाएको छ जुनको शितलता,

सूर्यको प्रताप, ताराको चमक 

अनि स्वयम् सप्तरङ्गी इन्द्रधनुष,

र,

त्यहाँ बसेको छ एउटा यस्तो बस्ती 

जहाँ मौलाएका छन् प्रेमका 

अनगिनती रहरहरु

फूलेका छन् प्रेमका सुन्दर फूलहरु  

जसको सुगन्धले मगमगाइ रहेको छ सम्पूर्ण समष्टी 

जसको नूरले चम्किरहेको छ सम्पूर्ण सृष्टि ।।